معادل القوّة الشرائيّة

بسبب عدم فهم مفهوم اقتصادي مهمّ جدّا
اسمه

معادل القوّة الشرائيّة
Purchasing Power Parity
أو اختصارا
PPP

-
يعني إيه معادل القوّة الشرائيّة
يعني
في البنك الدولار ب 16 جنيه
لكن
هل الدولار في أمريكا
يشتري اللي يشتروه ال 16 جنيه في مصر ؟!
طبعا لأ
وأيّ حدّ سافر هيفهم كده
-
وزمان المثل الشعبي اختصر ده ببساطة وقال
الجنيه جنيه بلده
-
يا أخي جدودنا سابوا لنا الحكمة في الأمثال
بسّ إحنا اللي مصرّين نتعلّم بالتجربة
-
الجنيه جنيه بلده
يقصد يقول لك الدولار دولار بلده
والريال ريال بلده
وهكذا
-
لو قبضت في السعوديّة 5000 ريال
ده يساوي إنّك تقبض في مصر 5000 جنيه
ده حسب المثل الشعبيّ
أو عمليّا 7000 جنيه تقريبا
حسب معادل القوّة الشرائيّة
-
هتقول لي لو حوّلت ال 5000 ريال
هيطلعوا ب 25 ألف جنيه
أقول لك
هتصرفهم في مصر ولا في السعوديّة ؟!
-
لو هتصرفهم في السعوديّة
يبقي الريال ريال بلده
يعني ال 5000 ريال في السعوديّة
هيجيبوا لك اللي يجيبوه 7000 جنيه في مصر
وده اللي اسمه "معادل القوّة الشرائيّة"
-
عاوز تستفيد بال 5000 ريال
يبقي تعيش عيشة العبيد في السعوديّة
تصرف أقلّ ما يمكن
وتحوّل الريالات لمصر
تحوّلها في مصر بسعر الصرف
وتصرفها في مصر
كده إنتا بتكسب
غير كده بلح
-
وبالمناسبة دي حاجة معروفة للي بيسافروا بردو
وعشان كده هتلاقيهم نادرا ما ياخدوا أهلهم
وده من أسباب اعتراضي الاساسيّة علي فكرة السفر
-
يعني إنتا من حقّك تحكم علي نفسك بالغربة
لكن مش من حقّك تحكم علي زوجتك وأولادك بالبعد عنّك
وتبقي إنتا في بلد وهمّا في بلد
-
إنتا متنازل عن حقّك فيهم ماشي
لكن مش من حقّك تجبرهم همّا كمان يتنازلوا عن حقّهم فيك
-
لكن
أنا مش كاتب البوست ده عشان اللي بيسافروا
أنا كاتب البوست ده عشان اللي ما سافروش
-
يعني
اللي سافر مرّة واتضحك عليه
بخدعة التحويل حسب سعر الصرف
عرف بالتجربة موضوع معادل القوّة الشرائيّة
-
ممكن هوّا ما عرفش الاسم الاكاديميّ
لكنّه عرف إنّ " الجنيه جنيه بلده "
هيّا بتعبّر عن نفس المفهوم الاقتصاديّ
-
بالمناسبة
المفاهيم الاقتصاديّة مقصود تعقيدها
عشان نفضل بهايم
ويفضل اللي فاهم يستنزف قوت اللي مش فاهم
ولا حول ولا قوّة إلا بالله
-
يعني ببساطة
لو عاوز تفهم يعني إيه معادل القوّة الشرائيّة
هات عشر سلع بتنتج محليّا في كلتا الدولتين
-
لكن لو السلعة مستوردة
فهيّا هتتحوّل الأوّل بسعر الصرف
وترجع يضاف عليها جمارك وضرايب وأرباح
فهتضرب لك الحسبة دي
فخلّينا في سلّة من المنتجات المصنّعة محليّا
-
احسب سعرهم في كل دولة
يعني خشّ السوبر ماركت
وهات سلّة املاها سلع
10 أرغفة
كيلو جبنه
لتر لبن
لتر عصير
صابونة
لتر زيت
كيلو سّكّر
كيلو أرز
وهكذا
-
احسب السلّة دي بكام في كلتا الدولتين
هتكتشف إنّ سلّة السلع اللي قيمتها 140 جنيه في مصر
قيمتها 100 ريال في السعوديّة
-
يبقي الريال السعوديّ ب 1.4 جنيه مصري
حسب القوّة الشرائيّة
الدولار الأمريكي يساوي 2.75 جنيه مصري
حسب القوّة الشرائيّة
وهكذا
-
وفيه معامل بسيط جدّا اسمه
Big Mac Index
بيحسب لك مرتّبك يجيب كام سندوتش بيج ماك
علي أساس إنّ السندوتش ده داخل فيه كلّ حاجة
إيجار مكان ونقل ولحوم وخضروات و و و
-
فمثلا واحد قاعد في فرنسا وبيقبض 3000 يورو
وواحد قاعد في ألمانيا وبيقبض نفس ال 3000 يورو
ما تبصّش لل 3000 يورو علي إنّهم متساويين
لا
-
شوف بتاع فرنسا يقدر يجيب كام سندوتش بيج ماك بمرتّبه
يطلعوا مثلا 1000 سندوتش
شوف بتاع ألمانيا يقدر يجيب كام سندوتش بيج ماك بمرتّبه
يطلعوا مثلا 750 سندوتش
-
يبقي اليورو في فرنسا يساوي 1.33 يورو في ألمانيا
يعني قيمته في فرنسا أعلي
يعني قوّته الشرائيّة أعلي
-
فرّق بين السعر والقيمة
القيمة ثابتة في حالة نفس السندوتش
لكن السعر مختلف
-
وطبعا ممكن القيمة نفسها تختلف
يعني ممكن نفس السندوتش تكون قيمته مختلفة في بلدين
ده صحيح
-
يعني ممكن نفس الموبايل السامسونج اللي بتشتريه من مصر
يبقي غير نفس الموبايل بنفس الموديل اللي بتشتريه من فرنسا
فرز تاني يعني - ههههه
-
فلو قادر تدخّل الموضوع ده في حساباتك يبقي ربّنا يعينك
-
وفيه مواقع متخصّصة إنّها تعطيك أسعار كلّ حاجة في كلّ بلد
وبناءا علي ده قدرنا نحسب ما يسمّي ب
معامل القوّة الشرائيّة المحليّة
Local Purchasing Power Index
يعني الحاجات الفلانيّة هحتاج اصرف كام عشان أجيبها
-
فيه مواقع ممكن تعطيك نموذج مقارن ل 100
يعني تقول له البلد الأساسيّة بالنسبة لي مثلا ألمانيا
يقوم يطلّع لك خريطة عليها ألمانيا مكتوب عليها 100
وباقي الدول عليها أرقام تانية
-
مثلا فرنسا عليها 130
بريطانيا عليها 90
إيطاليا عليها 150
-
يعني عاوز يقول لك
اللي هتجيبه في ألمانيا ب 100 يورو
هتجيبه هوّا هوّا في فرنسا ب 130 يورو
وهتجيبه هوّا هوّا في بريطانيا ب 90 يورو
وفي إيطاليا ب 150 يورو
-
الموضوع ده خطير جدّا إنّك تفهمه قبل ما تسافر
لأنّ اللي بيكلّمك من برّا هيحسبها لك بسعر الصرف
وهيلبّسك السلطانيّة
-
يعني هيقول لك مثلا
إنتا بتعمل الحاجة الفلانيّة في مصر ب 6000 جنيه
إيه رأيك تيجي تعملها في الكويت ب 100 دينار
حتّي احسبها ع الآلة الحاسبة كده
ال 100 دينار الكويتي هتحوّلهم في البنك ب 6000 جنيه
-
لو إنتا مش فاهم الموضوع اللي بنتكلّم فيه ده
يبقي آخرك في الصياعة إنّك هتقول له
لا هاعملها في الكويت ب 200 دينار
بينما هيّا سعرها الحقيقي في الكويت بألف دينار كامل
وإنتا مضحوك عليك في 800 دينار
-
أنا عملت كورس في الكويت
سعر الصرف يقول إنّ الكورس ده
يساوي تقريبا خمس أضعاف سعره في مصر
-
أيوه عادي
عاوز نتحاسب بسعر الصرف
هات مهندسينك وتعالوا أعطيكوا الكورس في مصر !!!
-
عاوز نعمل الكورس في الكويت
يبقي نتعامل بمعادل القوّة الشرائيّة
الموضوع بسيط
-
أنا أحد الدكاترة المهندسين قال لي من فترة
أيّام ما كان الدولار ب 7 جنيه
إنّه بيعطي الكورس في الخليج
بنفس سعره في مصر - بسّ بالدولار
-
يعني لو الكورس في مصر ب 5000 جنيه
يبقي في الخليج ب 5000 دولار
وشّ كده
-
أنا يوميها اتصدمت
لكن الحقيقة إنّ كلامه ما كانش صادم
أنا اللي كنت جاهل
-
فرسالة البوست ده بتقول لحضرتك
قبل ما تسافر
شوف إنتا يرضيك قدّ إيه مرتّب في مصر
واحسب سعره خارج مصر بناءا علي معامل القوّة الشرائيّة
مش علي أساس سعر الصرف
-
يعني مثلا
خلّينا نقول إنّك يرضيك في مصر 6000 جنيه
دول بالسعودي يساووا مثلا 1200 ريال
فإنتا لو اتعرضت عليك شغلانة ب 3000 ريال
هتتبسط بيهم
لأنّك هتروح زيّ الباشا تحوّلهم ل 15000 جنيه
بناءا علي سعر الصرف
-
بينما ال 3000 ريال سعودي
يساووا بمعادل القوّة الشرائيّة 4500 جنيه فقط
وهو أقلّ من ال 6000 جنيه اللي يرضوك في مصر
-
طبعا الحسبة أعقد من ذلك
لأنّك هتصرف جزء من مرتّبك في السعوديّة
وهتحوّل جزء لمصر
يعني هتصرف مثلا 1000 ريال
وتحوّل ألفين
-
بسّ ما تدخلش في الحسبة الطويلة دي
احسبها زيّ ما قلت لك إجمالي بمعادل القوّة الشرائيّة
يعني لو يرضيك في مصر 6000 جنيه
يبقي مرتّب السعوديّة ما يقلّش عن 4000 ريال
وترجع تضيف بقي تمن الغربة و و و
هتلاقي نفسك وصلت للمعادلة
اللي الدكتور المهندس قالها لي من سنين
وأنا ما كنتش فاهمها
-
يعني هيبقي ال 6000 جنيه في مصر
يساووا 6000 ريال في السعوديّة
ويبقي الجنيه جنيه بلده - والريال ريال بلده
ويبقي ربّنا يرحم أجدادنا
-
ولو حدّ قال لك وهوّا مفنجل عنيه وبيزعّق لك
عاوز 6000 ريال ؟!
يعني 30000 جنيه مصري ؟!
قول له بمنتهي البرود
انا مستعدّ أشتغل لك نفس الشغلانة
ب 6000 جنيه
بسّ في مصر
موافق علي كده أهلا وسهلا
لكن عاوزني أشتغلهالك في السعوديّة
تبقي ب 6000 ريال
-
لو شايف إنّ كلامي غلط
وإنّ الصحّ هوّا التحويل بسعر الصرف
إنتا حر
حوّلهم بسعر الصرف ل 1200 ريال
وسافر علي 2000 ريال وإنتا فرحان
-
أمّا أنا فهحوّلهم بمعامل القوّة الشرائيّة ب 6000 ريال
عاجبهم علي كده عاجبهم
مش عاجبهم يبقي ال 6000 جنيه هنا
أحسن لي من ال 2000 ريال هناك
-
إنتا مش عاوز تفهم يبقي براحتك
سافر واتخزوق
وارجع قول كان فيه واحد اسمه محمود مرزوق
نصحني وإنا اللي ما سمعتش كلامه
-
من الآخر خد الجملة دي هيّا خلاصة الموضوع
بسّ عاوزة تركيز
ال 6000 ريال في السعوديّة يساووا 6000 جنيه في مصر
وال 6000 ريال في مصر يساووا 30 ألف جنيه في مصر
-
اقرأها مرّتين تلاتة وبعدين كمّل
-
لاحظت الفرق ؟!
الفرق هو كلمة "مصر" اللي في الجملة التانية
يبقي إنتا في الجملة التانية بتحوّل ريالات وإنتا جوّا مصر
فإنتا بتحوّل حسب سعر الصرف
-
لكن الجملة الأولي كانت بتقول
ال 6000 ريال في "السعوديّة" يساووا 6000 جنيه في مصر
-
عمركش سألت نفسك ليه لمّا بتبيع حاجة لسائح أجنبي
بياخدها بالدولار عادي بسعر يعتبر مبالغ فيه ( بالنسبة لنا )
يعني هوّا ممكن يفطر فول ع العربيّة ب 5 دولار
ويبقي هايص وبيتصوّر سيلفي
-
بينما البيّاع فاكر نفسه نصب ع الخواجة
هوا الخواجة ما اتنصبش عليه ولا حاجة
انتا بالنسبة لك هوّا كده فطر فول ب 100 جنيه
لا خالص
هوّا بالنسبة له بيفطر في أمريكا ب 10 دولار
فال 5 دولار مش بيوجعوه زيّ ما ال 100 جنيه بيوجعوك
-
لكنّه لو عاش معاك في مصر
واتعوّد يفطر فول ع العربيّة كلّ يوم
شهر وتلاقيه بيقول لك
عاكش فكّة ميّا خمسينتيه
علي رأي أحبابنا في كفر الشيه
-
ولو هياخد الفول معاه البيت
هيقول لك هات لي باتنين جنيه
كلّ جنيه لوحده
-
لذاذ قوي الناس اللي فاكرين نفسهم بينصبوا ع الخواجات دول
-
طبعا الإعلام باعتباره وسيلة لتجهيل الشعوب مش تعليمها
بيقول لك
لتر البنزين في أمريكا أو أوروبا ب 30 جنيه
ويسكت
-
لا يا باشا
عاوز تقيّم صحّ
يبقي طالما هتحسب الدولار في أمريكا بالجنيه في مصر
يبقي لازم تحسب بمعادل القوّة الشرائيّة
-
يعني تقول إنّ الدولار في أمريكا يساوي 2.74 جنيه في مصر
يبقي لتر البنزين في أمريكا بحوالي 2 جنيه في مصر
يعني البنزين في أمريكا أرخص من مصر
-
عاوز تحوّل بسعر الصرف
يبقي لازم التحويل يحصل جوّا بلد واحدة
يعني إدّيني مرتّبي في مصر 3000 دولار
وحاسبني علي لتر البنزين ب 30 جنيه أنا موافق
أو بنصّ دولار أنا موافق بردو
-
فالبلّاعة الاقتصاديّة دي احذر الوقوع فيها
-
ده لينك موقع بيحسب لك معادل القوّة الشرائيّة
http://salaryconverter.nigelb.me/
-
وده موقع نامبيو - من أشهر المواقع لحساب تكلفة المعيشة
https://www.numbeo.com/cost-of-living/
-